్‌ సోషల్‌ మీడియాలో ఆమె పాపులర్‌. ఫేస్‌బుక్‌లో ఆమె పెట్టే పోస్టులకు కనీసం 500 లైకులుండాల్సిందే. కథ,కవిత,చిత్రాలు, సమీక్షలు, వంటలు వంటివి ఏం పెట్టినా ఇలా లైకులు పడుతూనే ఉంటాయి. ఒక వైపు గృహిణిగా మరో వైపు సాహిత్య సేద్యంలో విభిన్న పార్శాలను సృజిస్తూ అలుపెరగని నజ్మా షమ్మి..పదేళ్లల్లో ఎంతో మంది అభిమానాన్ని సంపాదించుకున్నారు. ఒక వైపు అవార్డులు,మరో వైపు సన్మానాలు..ఇలా చెప్పుకుంటూ పోతే అక్షరాలు తరగవు. పేజీలు చాలవు. నవభూమి డైలీ సాహిత్య అభిమానుల కోసం నజ్మా షమ్మితో ఇంటర్వ్యూ..
ప్రశ్న: మీరొక గృహిణిగా, రచయిత్రిగా, కవయిత్రిగా, చిత్రకారిణిగా ఒకేసారి అనేక భూమికలు నిర్వహిస్తున్నారు. ఈ బహుముఖ ప్రయాణం ఎలా మొదలైంది?
సమాధానం: నిజం చెప్పాలంటే, నేను సాధారణ గృహిణిగానే నా జీవితాన్ని ప్రారంభించాను. కాని నా లోపల మాటలు ఎప్పుడూ ఉప్పొంగేవి. ప్రతి అనుభవం ఒక ఆలోచనను కలిగించేది. ఆ ఆలోచనలకూ, భావాలకూ అక్షరరూపం ఇవ్వాలనిపించినప్పుడు రచన నా సహచరిగా మారింది. అలా కథలు, కవితలు రాయడం మొదలైంది. చిత్రలేఖనం కూడా నన్ను చిన్నప్పటినుంచే ఆకర్షించేది. జీవనాన్ని చూసే నా దృష్టి ఆ రంగుల్లోనూ, పదాల్లోనూ ప్రతిబింబిస్తూనే ఉంది.
ప్రశ్న: మీ కుటుంబం గురించి చెప్పగలరా? కుటుంబం మీ రచనలకు ఎంతవరకు ప్రేరణ ఇచ్చింది?
సమాధానం: నా భర్త సయ్యద్‌ షమ్మి గారు సబ్‌మరైన్‌ పోలీస్‌ విభాగంలో పని చేస్తున్నారు. ఆయన మద్దతు నాకు ఎంతో బలమైంది. నాకు ఇద్దరు పిల్లలు` పెద్ద కుమారుడు వైద్యరంగంలో, చిన్నవాడు సాఫ్ట్వేర్‌ ఇంజినీర్‌. వారిని చూసి నేను గర్వపడతాను. నా కుటుంబం నా వెన్నుదన్నుగా ఉండడం వల్లే నా సృజనాత్మకతకు ఆత్మ విశ్వాసం వచ్చింది. గృహిణిగా నా బాధ్యతలతోపాటు సాహిత్య సృజనను నడిపించగలిగాను.
ప్రశ్న: మీరు ఇప్పటివరకు ఎన్ని రచనలు చేశారు? వాటిలో ఏవైనా మీ హృదయానికి దగ్గరగా ఉన్నాయా?
సమాధానం: నేను 80కుపైగా కథలు, ఒక నవల, యాభైకుపైగా కవితలు రాశాను. ముఖ్యంగా నిజజీవితాన్ని ఆధారంగా చేసుకుని రాసిన కథలు, మహిళల అంతరంగాన్ని ప్రతిబింబించే కవితలు నాకు ఎంతో సన్నిహితంగా అనిపిస్తాయి. ‘అజ్ఞాతంలోని వెలుగులు’ అనే నా కథ నాకు ప్రత్యేకమైన అనుభూతి ఇచ్చింది. ఎందుకంటే అది ఒక పర్దా వెనుక జీవితం గడిపే ముస్లిం మహిళ గాథ. నా రచనల్లో సమాజపు వాస్తవాలు, మానవ సంబంధాల తాలూకు తపన ఎల్లప్పుడూ ప్రతిధ్వనిస్తాయి.
ప్రశ్న: ఆకాశవాణి ద్వారా మీ కథలు ప్రసారం అయ్యాయి. ఆ అనుభవం ఎలా అనిపించింది?
సమాధానం: ఆకాశవాణి ద్వారా నా కథలు వినిపించడం నాకు అమితానందం కలిగించింది. ఎందుకంటే నా పదాలు, నా ఊహలు కేవలం పుస్తకాలకే పరిమితం కాకుండా శ్రోతల చెవులకు చేరాయి. ఆ అనుభూతి వర్ణించలేనిది. ఒక రచయితకు తన రచన పాఠకుడు, శ్రోత వరకు చేరడమే గొప్ప గుర్తింపు.
ప్రశ్న: మీ కవిత్వం గురించి ప్రత్యేకంగా చెప్పగలరా?
సమాధానం: నా కవిత్వం చాలా వరకు భావోద్వే గాలకు అద్దం పడుతుంది. బాంధవ్యాల సున్నితత్వం, తల్లితనపు కరుణ, మానవ సంబంధాల ఆత్మీయత, వేదన - ఇవన్నీ నా కవిత్వానికి ప్రాణం. ఉదాహరణకు, ‘ముస్లిం స్త్రీ’ అనే కవితలో పర్దా వెనుక ఉన్న నిశ్శబ్ద ఆర్తనాదాన్ని ఆవిష్కరించాను. కవిత్వం నాకు ఓ ధ్యానం లాంటిది. అది నన్ను నేను అర్థం చేసుకునే మార్గం.
ప్రశ్న: మీరు చిత్రకారిణి కూడా. ఆ కళతో మీ సాహిత్యానికి ఏమైనా సంబంధం ఉందా?
సమాధానం: నాకు పదాలు మాత్రమే కాదు, రంగులు కూడా అంతే ప్రియం. కాగితం మీద రేఖలు, రంగులు వేసే ప్రతి సారి ఒక కవిత పుడుతుంది. నా చిత్రాలు కూడా కథ చెబుతాయి. సాహిత్యం, చిత్రకళ రెండూ నా అంతర్మనసులోని భావాల ప్రతిబింబాలు. ఒకటి అక్షరాల్లో పుడితే, మరొకటి రంగుల్లో పుడుతుంది.
ప్రశ్న: మీరు పొందిన గుర్తింపులు, అవార్డుల గురించి చెప్పగలరా?
సమాధానం: అవును, నాకు దేశస్థాయి, రాష్ట్రస్థాయి అనేక అవార్డులు వచ్చాయి. అందులో ముఖ్యమైనది 2023లో కేంద్ర ప్రభుత్వం తరఫున సుష్మా స్వరాజ్‌ అవార్డు అందుకోవడం. ఆ గౌరవం నా జీవితంలో ఒక మైలు రాయి. అదొక్కటే కాదు, స్థానిక సాహిత్య సంస్థల నుండి వచ్చిన గుర్తింపులు కూడా నాకు ఎంతో విలువైనవి. అవి నా కృషికి సమాజం ఇచ్చిన ఆమోద ముద్రలు.
ప్రశ్న: మీ రచనల్లో ముస్లిం మహిళల సమస్యలు ప్రతిబింబిస్తాయని చెప్పారు. ఈ అంశం మీద మీ దృష్టి ఎందుకు ఎక్కువగా పడిరది?
సమాధానం: ఎందుకంటే నేను స్వయంగా ఆ సమాజంలో పెరిగాను. పర్దా వెనుక ఉన్న అనేక స్త్రీల జీవితం నాకు తెలిసిన వాస్తవం. వారి స్వరాలు చాలా వరకు వెలుపలికి రాలేదు. నా కలం ఆ స్వరాల ప్రతినిధి. నేను వారి మౌనాన్ని అక్షరాలుగా మలచాను. ఒక మహిళ గుండె నిండిన ఆశలు, అణచివేతలు, బాధలు - ఇవన్నీ నా కథల్లో, కవితల్లో ప్రతిఫలిస్తాయి.
ప్రశ్న: భవిష్యత్తు లక్ష్యాల గురించి చెప్పగలరా?
సమాధానం: నాకు ఒక వృద్ధాశ్రమం నిర్మించాలని కల ఉంది. వృద్ధాప్యంలో నిర్లక్ష్యానికి గురవుతున్న వారిని చూసి నా హృదయం కలిచివేస్తుంది. వారిని ఆదుకోవడం నా బాధ్యత అని భావిస్తున్నాను. అంతేకాదు, తెలుగు భాషను కాపాడటానికి కూడా నేను చిన్న ప్రయత్నం చేయాలనుకుంటున్నాను. తెలుగు సాహిత్యం మరింత బలంగా నిలవాలని కోరుకుంటున్నాను.
ప్రశ్న: మీ హాబీలు చాలా విభిన్నంగా ఉన్నాయంటారు. వాటి గురించి వివరించగలరా?
సమాధానం: అవును. నాకు పెయింటింగ్‌, గార్డెనింగ్‌, పెంపుడు జంతువులను చూసుకోవడం, కుట్లు, తాపీ పని %-% ఇవన్నీ ఎంతో ఇష్టం. ఇవి నా మనసును సేదతీరుస్తాయి. సృజనాత్మకత అనేది ఒకే రంగంలో పరిమితం కాదు. ఒక రచయిత మనసు పలు రూపాల్లో తనను వ్యక్తపరుస్తుంది. నాకు కూడా అలా జరుగుతుంది.
ప్రశ్న: సాహిత్యం మీ జీవితంలో ఏ స్థానం పొందింది?
సమాధానం: సాహిత్యం నా శ్వాస. అది లేకుంటే నేను లేను. అది నాకు కేవలం వృత్తి కాదు, ఒక జీవన విధానం. నా అనుభవాలను, నా భావోద్వేగాలను, నా చుట్టూ ఉన్న సమాజపు వాస్తవాలను పదాలతో పంచుకోవడమే నాకు పరమానందం. నా కలం సమాజానికి కిటికీ. దాని ద్వారా నేను నాకూ, ప్రపంచానికీ అర్థాన్ని వెతుక్కుంటాను.
ప్రశ్న: పాఠకులకు మీరు చెప్పదలచిన సందేశం ఏమిటి?
సమాధానం: నేను చెప్పదలచింది ఒక్కటే - ప్రతి ఒక్కరూ తమలోని సృజనాత్మకతను బయటకు తేవాలి. మహిళలు ముఖ్యంగా తమలోని శక్తిని నమ్మాలి. గృహిణిగా ఉండటం ఒక గొప్ప పాత్రే, కానీ దానితోపాటు సమాజానికి తోడ్పడగలగడం మరింత అద్భుతం. సాహిత్యం, కళలు మనిషిని మానవత్వం వైపు నడిపిస్తాయి. వాటిని కాపాడుకుందాం. నెల్లూరు రచయితలసంఘం, నవ్యాంధ్ర రచయితల సంఘంసభ్యురాలిగా క్రియాశీలకంగా వ్యవహరిస్తున్నాను.
ఇంటర్వ్యూ: అజీద్‌
